Act 20 | YML | STEP | Tomotoga yadi nuasako i 'a'ava i nagoi yadi vanuge, mulieta Faulo tovetumaganavo i goleva'augidi i velu'ase'asedi wata i kiavefa'alidi. I 'a'avana i 'alanuai 'waidie i 'iawedi i nago Masidonia.

Acts 20

Faulo ma enavo i nagoi Masidonia wata Gulisi.

1 Tomotoga yadi nuasako i 'a'ava i nagoi yadi vanuge, mulieta Faulo tovetumaganavo i goleva'augidi i velu'ase'asedi wata i kiavefa'alidi. I 'a'avana i 'alanuai 'waidie i 'iawedi i nago Masidonia. 2 'Awalawanina 'waineamo i nunago tovetumaganavo 'adi 'aila'a 'aitamogana 'aitamogana i 'ivaisedi yadi vetumagana i vetoketoke yana lau'age 'wainega, mulieta i nago i le'wa 'awalawa Gulisi. 3 Bei weta'i 'aitonu nagedie i miamia mulieta i 'idewadewa igodi wakeamo i da nago Silia, siwe vala i nogai me Diu 'ana laugiva 'ana 'eda 'akonadi i veluagai bega i na luvewafai. Faifainanina i vilai Masidonia 'waineamo i nagoi ma 'ana 'weabuvo taiadi. Tomotoganidi side 'adi wagava.

Sofata, taunina tomogo Belia, Filiasi natuna,

Alisitako wata Sekanido, 'atamana Tesalonaika 'wainega,

Gaiasa, tomogo Debi,

Timoti,

Tikiasa wata Tolofimo, 'awalawa Eisia 'wainega.

5 Tomotoganidi i kumeta i lulukamasema 'atamana Tiloasi 'waineye. 6 Tutuyanina 'waineye me Diu i sakali, beledi kebu 'ana 'ivebwaika i 'ani, 'adi 'eba tolinuata'i basenadiotoga Yaubada tubudiavo i 'ita'ita'iedi i vagavaidi 'awalawa Itifita 'wainega. Sakalinina i 'a'avana, yau ^{▼▼Taunina Luke. Buki de'e 'ana tokiluma.} ma ekwavo 'a dodoga Filifai 'wainega 'a nunagoi 'aiata 5 nagedie, mulieta 'a le'wa Tiloasi, bei tomotoganidi 'a veluagadi wata 'a miamiani wiki 'aitamogana.

S3 Fol 20:19S4 Fol 19:29, 21:29 Efe 6:21

Faulo tovetumaganavo i fogedi Tiloasi 'waineye.

7 Satadei lavilavie, tovetumaganavo matatabuma 'a 'aniluvetubama, i 'a'avana Iesu 'ana 'eba nuave'avina faifaina 'a 'ani. Fai 'awa'awaie Faulo i na tauya, begaidi i veifufuga lovana 'ana utukamwana. 8 Vanuganina 'waineye 'a va'autaga 'etotubwatubwana tutudaba 'ifwaidi dibuneye, 'ifwaidi kamwaneye, wata 'ifwaidi tabwaotogineye. Tutudabanina 'waineye 'a miava'autaga tabwaotogineye bei mageta fuedi i 'ala'alata. 9 We'e tamu tubuau 'ana wagava Iutiko tutubweka 'waineye i miabui Faulo yana veifufu i vavainenega. Yana veifufu i vemanamanawe begaidi Iutiko matana i duduna. I vevemataduduna nika i be'u i obu tanotanoge. Tomotoga i obu i silakai 'akonadi i wafa. 10 Faulo i obu tubuaunina tabwaneye i lumata'afufu i 'avalamaigi i vo, Kebu nuafoumi i na veviga, ma yawaina.” 11 Mulieta wata i viladi i laka tutudabanina 'waineye bei i 'ani Iesu 'ana 'eba nuave'avina faifaina. 'Ani i 'a'ava, wata Faulo i velamu i veifufuga nika i 'atai i tauya. 12 We'e enavo i nagoi yadi vanuge ma yadi sosoana tubuaunina taiadi.

Tiloasi 'wainega i nagoi Milito.

13 Emavo 'a 'iawedi, Faulo i vonema bega 'a dodoga 'a kumeta 'a nagoi Asosa, bei Faulo 'a lulukamaseni i yoyogodaba 'ageneamo i mimai. 14 Tutuyanina Faulo i veluagama Asosa, ma fuema 'a dodoga 'a nagoi 'atamana Mitilini. 15 Wata bega Mitiliniega 'a tauya 'awa'awaie Kaiosi tabwaneamo 'a yogo-vagata. Wata 'aiata 'aitamogana i 'a'ava 'a le'wa Samosi bega 'awa'awaie Efeso tabwaneamo 'a yogo-vagata 'a nago 'a luku Milito. 16 Faulo i walowaloga nuanuana nagami i na le'wa Ielusalema mulieta Diu yadi Sakali Fenitikosi 'ana 'aiata i na veluagai. Faifainanina kebu nuanuana i na yogomia 'awalawa Eisia nageneye, begaidi kebu 'a da lukuga Efeso.

Faulo i 'alanuaidi Efeso 'ana to'edakumetavo 'au'auveadi.

17 Tutuyanina 'a luku Milito, Faulo vala i vetunei Efeso bega tovetumaganavo yadi to'edakumetavo 'au'auveadi i na maia taiadi i na veifufu. 18 Tomotoganidi i le'wai Faulo i veifufu 'waidie i vo, Basenadi a mai Eisia yami 'awalaweye i maiga 'asiau de'e ma yaku nuaobu a vetofolova 'Auvea faifaina, wata ma matageuku a nuavita faifaimi fai nuanuaku bwaikina Iesu 'wa na vematayakeyakeni. We'e me Diu igodi nuanuadi i da luvewafaku faifainanina tutuya vitadi a veveluagadi. Naninidi de'e 'akonadi 'wa 'asetadi. 20 Iesu Valana 'Atumaina a lalau'age fuedi matadie, wata yami vanuga 'waidie a veve, vonanidi 'ami 'aivaita kebu tamu a da giveniga. 21 Me Diu wata mali tomotoga taunidi kebu Diu kebu a da lu'idia, a vonedi yadi sakona i na bailedi i na nuaviladi Yaubada 'waineye, wata 'ada Toveimea Iesu i na vetumaganeni.

22 We'e yau 'Anu'anunu 'Atumaina i lukakadeku a nunago Ielusalema, kebu a da 'asetaiga ava'ai i na souyeni 'waikuye no'o bei. 23 Siwe 'Anu'anunu 'Atumaina 'akonadi i voneku 'atamana 'aitamogana 'aitamogana 'waidie tutuya vitadi a na veveluagadi wata tomotoga i na 'i'ive'aviniku i na yatoyatoku vanuga 'eba yogona 'waidie. 24 'Ai'edi a na wafa 'alo ma yawaiku 'asa'aiana kebu tamu ava'ai. Siwe nani bwaikina 'waikuye nuanuaku nagami folova basenadi Toveimea Iesu i velekuga a na ve'a'avai. Folovanina Vala 'Atumaina Yaubada yana nuakalikali bwaikina faifaina a veve tomotoga 'waidie.

25 Side bani'odi. Tutuya fuedi matamie a lalau'age Yaubada yana veimea tomotoga 'waideye faifaina, siwe 'awaie kebu tamu aitoi 'waimiega maigiku i na 'ise'iseni. 26 Siwe tutuya de'e a na vonemi, 'ai'edi tamu aitoi 'waimiega i na wafa ma yana sakona i na luku 'ai-'ala'alase kebu i na 'uvaniku. 'Omi taunimi, yau kebu fai 'akonadi Yaubada yana nuanua matatabuna 'ita'ita'i faifaina a lu'ivoneyedi 'waimie, kebu tamu nani a da giveni. 28 Taunimi 'wa na 'i'isave'avinimi fai 'Anu'anunu 'Atumaina i venua'ivinemiga Yaubada 'ana tovetumaganavo 'adi 'aila'a 'wa na 'isave'avinidi. 'Aila'anidi Yaubada i veakutagonidi taunina natuna yana wafa 'wainega. Taunidi bani'odi sifi, we'e 'omi 'adi to'isave'avinavo. Bola a na 'iawemi a 'asetai tomotoga 'ifwaidi i na mai i na vekaliedi nuanuadi i na sakona, bani'odi 'ou'ou kasikasisidi sifi i ovaovadi, faifainanina 'wa na 'isave'avina-dewadi. 30 Wata tutuya mulina 'waineye, 'ifwaidi tomotoga taunimi yami 'aila'a 'wainega ediavo i na vekaliedi bega yadi sauluva wata yadi nuanua i na vetutuyamedi. 31 Begaidi 'wa na 'isa'isa i na nunago i na vekaliemi. 'Wa na nuani 'aiata wata lovana malamala 'aitonu nagedie kebu a da veawai ma matageuku a veve 'waimie.

32 Bega 'asiau de'e a na 'iawemi, a 'anivelenemi Yaubada 'waineye i na 'i'isave'avinimi wata yana nuakalikali valana i na kalififinemi. Valanina 'ana fata yami vetumagana i na kiavetoketokedi wata Yaubada i na vesauluva-'atumaiemi wata nani fuedi 'atumaidi i yato'idiediga yana tomotoga faifaidi i na velemi. 33 'Waimiega kebu tamu aitoi yana mani 'alo yana kukua 'adi 'ewa faifaidi a da nuagiva. 34 'Akonadi 'wa 'asetai yau wata ekwavo taiadi kebu vakeli 'a da 'ani'ani, tauniku nimakuyega 'a folofolova bega 'ama'ama wata yama kukua a kimwakimwane. 35 Yaku sauluva 'waidiega a vemi egavo kebu 'adi fata i na folova ta na 'ivaisedi yada folova toketokedi 'waidiega. Ta na nuani Toveimea Iesu taunina yana vona basenadi i vo, Ta na 'une ta na sosoana, we'e ta na ve'unega 'eba sosoana bwaikaotogina.”

36 Tutuyanina Faulo yana vona i 'a'ava, matatabuma 'agema 'a vetufano'uyedi Yaubada 'waineye 'a velu'ui. 37 Matatabudi Faulo 'ana mogai i 'we'wela wata i 'avalamaigi. 38 Yadi nuavita bwaikaotogina Faulo yana vona faifaina fai i vonediga kebu wata i na 'ise'iseniga. I 'a'avana ma fuema 'a nagoi wakeye 'ima 'a dodoga.

S22 Fol 19:21S23 Fol 21:11S24 2 Tim 4:7S28 1 Fit 5:2
S29 Mad 7:15S32 Kolos 1:12, 2:7S34 Fol 18:3S38 Fol 20:25